Monday, February 15, 2016

മൗദൂദിസത്തിന്റേയും വഹാബിസത്തിന്റേയും സാമൂഹ്യപരീക്ഷണങ്ങൾ

ഈ മുറിയിലുള്ള ആനയെപ്പറ്റി ഇനി സംസാരിയ്ക്കാതിരുന്നിട്ട് ഒരു കാര്യവുമില്ല.

മൗദൂദിസവും വഹാബിസവും കാലാകാലങ്ങളായി കാശ്മീരിൽ മാത്രമല്ല, പാകിസ്ഥാനിൽ മാത്രമല്ല, അഫ്ഗാനിസ്ഥാനിൽ, പഖ്തൂൺഖ്വായിൽ, മിഡിലീസ്റ്റിലാകെ മാത്രമല്ല ലോകം മുഴുവൻ ഇസ്ലാം മതവിശ്വാസികളുടെയിടയിൽ പടർത്തുന്ന ജിഹാദിസത്തിന്റെ ബാക്കിപത്രമാണ്  കാശ്മീരിൽ അങ്ങോളമിങ്ങോളം പൊട്ടിയൊഴുകുന്ന ഭാരതവിരുദ്ധ വികാരം.

ഐ എസ് ഐ പരീക്ഷിച്ച് ലോകം മുഴുവൻ വിജയിപ്പിച്ച സോഷ്യൽ എഞ്ചിനീയറിങ്ങ്. ഈ സോഷ്യൽ എഞ്ചിനീയറീങ്ങിനെപ്പറ്റിയറിയാൻ കാശ്മീരിലൊ അഫ്ഗാനിലെ ഗുഹയിലോ ഒന്നും തന്നെ പോകണ്ട, വികസിത രാജ്യമായ യൂകേയിലെ  ബിർമിംഹാമിലോ, ഡാർബിയിലേ, ബ്രാഡ്ഫോർഡിലോ (ബ്രാഡ്സ്ഥാൻ ന്നാണ്), ലണ്ടനിലോ, ബെർലിനിലോ, ഫ്രാങ്ക്ഫർട്ടിലോ, ആംസ്റ്റർഡാമിലോ ...നിങ്ങളൊക്കെ ലോക ലിബറൽ കേന്ദ്രങ്ങൾ എന്ന് കരുതുന്ന ഏത് മൂലയിലെ ഒരു രണ്ടാം തലമുറ മുസ്ലീം യുവാക്കളുടെ കൂട്ടത്തോടും പോയി നിന്ന് സംസാരിച്ചാൽ മതി.

അതിൽ നിന്ന് മാറിനിൽക്കുന്ന ഒരേയൊരു വലിയ മുസ്ലീം സമൂഹം മുഖ്യധാരാ ഇൻഡ്യയിൽ മാത്രമാണുള്ളത്. അതിനേയും പല രീതിയിൽ മൗദൂദിസ്റ്റ് വഹാബിസ്റ്റ് ആയി മാറ്റാൻ പരിപാടികൾ ഒരുപാട് കാലമായി നടക്കുന്നു.

ബ്രിട്ടണിൽ ആർമിയിൽ ജോലി ചെയ്യുന്നത് 560 മുസ്ലീങ്ങളാണ്. ബ്രിട്ടീഷ് ആർമി എന്നത് ഒരു വലിയ ഇൻസ്റ്റിറ്റ്യൂഷനും ഒരു ജോലി ആണ് ആവശ്യമെങ്കിൽ ആരോഗ്യമുള്ളവർക്ക് പെട്ടെന്ന് ജോയിൻ ചെയ്യാവുന്ന ഒരു ഇൻസ്റ്റിറ്റ്യൂഷനുമാണ്. നാഷണാലിറ്റി പോലും അതിൽ പ്രശ്നമല്ല. നേപ്പാൾ/ഇൻഡ്യൻ പൗരന്മാരായ ഗൂർഖകൾ ഒരു റജിമെന്റായിത്തന്നെ ബ്രിട്ടീഷ് ആർമിയിലുണ്ട്. ബ്രിട്ടീഷ് പൗരൻ പോലുമാകണ്ട അതിൽ ചേരാനും നല്ല ശമ്പളവും ജീവിതസൗകര്യങ്ങളനുഭവിയ്ക്കാനും എന്ന് സാരം.

ഔദ്യോഗിക കണക്ക് പ്രകാരം ഏതാണ്ട് 1600ലധികം, ചിലരത് രണ്ടായിരവും മൂവായിരവുമൊക്കെ പറയുന്നു ആൾക്കാരാണ് ബ്രിട്ടണിൽ നിന്ന് മാത്രം ഐസിസിൽ ചേർന്നിരിയ്ക്കുന്നത്. ഐസിസിൽ. പൊതുധാരാ ഇസ്ലാം സമൂഹം ഒട്ടുമുക്കാലും ഫ്രൗൺഡ് അപ്പോൺ ചെയ്യുന്നവർക്ക് ബ്രിട്ടണിൽ നിന്ന് കിട്ടിയ സജീവ വോളണ്ടിയർമാരെപ്പറ്റിയാണ് പറയുന്നത്. കുഞ്ഞ് മക്കളെ കളഞ്ഞ് പോയ അമ്മമാർ, പതിനാറും ഒക്കെ പ്രായമുള്ള പെൺകുട്ടികൾ, മക്കളേയും ഭാര്യമാരേയും കളഞ്ഞ് പോയ അച്ചന്മാർ ഉൾപ്പെടെ.

കുടുംബത്തിലെല്ലാരും നല്ല ലിബറൽ മൂല്യങ്ങൾ സൂക്ഷിയ്ക്കുന്ന നമ്മൾ ഡേ ടു ഡേ ലൈഫിൽ കാണുന്ന കുടുംബങ്ങളിൽ നിന്നുള്ളവരാണു മിക്കവരും. അല്ലാതെ സെക്ളൂഡഡ് ആയ കമ്യൂണിറ്റികളിൽ നിന്നൊന്നുമല്ല. എന്താ ബ്രിട്ടീഷ് ഗവണ്മെന്റ് ഫെയിൽഡ് ആയിട്ടാന്നോ അങ്ങനെ സംഭവിച്ചത്?

ലോകമാകെ വ്യാപിച്ച ഈ സോഷ്യൽ എഞ്ചിനീയറിങ്ങ്  തുടങ്ങിയത് പഖ്തൂൺഘ്വായിലാണ്. പാകിസ്ഥാന്റെ ഭാഗമായി ബ്രിട്ടീഷുകാർ വരച്ച് ചേർത്ത സാംസ്കാരിക അഫ്ഗാൻ ഭാഗം. ഇൻഡ്യയിലെ പത്രങ്ങളൊക്കെ പഖ്തൂൺഖ്വാ യെപ്പറ്റി പറയുമ്പൊ പാകിസ്ഥാന്റെ ഗോത്രഭാഗം എന്നാണ് പറയുക. അങ്ങനെയല്ല. പഞ്ചാബിലും സിന്ധിലുമുള്ളവരേക്കാൾ സാംസ്കാരികമായും വിവിധതയാലും സമ്പന്നമായിരുന്ന പഷ്തൂണികൾ ഇന്ന് നിരന്തരം ആക്രമിയ്ക്കപ്പെടുന്നവരാണ്. മലാല യൂസഫ്സായ് അവിടെ നിന്നുള്ളവരാണ്.

അമ്പതുകളിൽ ഒരുകൂട്ടം ട്രെയിൻഡ് ആൾക്കാരെ പുറത്ത് നിന്ന് പള്ളികളിൽ മൊല്ലാക്കമാരായി നിയമിച്ചും പുതിയ പള്ളികൾ ഉണ്ടാക്കിയുമായിരുന്നു തുടക്കം. പള്ളികൾ കേന്ദ്രീകരിച്ച് മദ്രസകൾ തുടങ്ങി. മദ്രസകളിൽ മൊല്ലാക്കമാരെ മൗദൂദി ട്രെയിനിങ്ങ് കിട്ടിയവർ പാക് പഞ്ചാബിൽ നിന്നും കൊണ്ട് വന്ന് നിയമിച്ചു. ആ മൊല്ലാക്കമാർ നമ്മടെ പരശ്ശതം സക്കീർ നായികുമാരേയും മുജാഹിദീൻ ബാലുശ്ശേരിമാരേയും പോലെ മത പ്യുരിട്ടനിസം പ്രചരിപ്പിയ്ക്കാൻ തുടങ്ങി. മദ്രസകളിൽ അവരുടെ ഇസ്ലാമിനെപ്പറ്റി പഠിപ്പിയ്ക്കാൻ തുടങ്ങി.

അങ്ങനെ ജമായത്തേക്കാർക്ക് ചന്ദനക്കുടവും, മുട്ടമന്ത്രവാദവും, ജിന്നും, കെട്ടുകാഴ്ചയും , എഴുന്നള്ളത്തും,  പ്രാർത്ഥനയും, മറ്റു മതക്കാരും നല്ലവരെന്ന ചിന്തയും, നിലവിളക്കും മെഴുകുതിരിയും
അമ്പലങ്ങളിലും ചർച്ചിലും
സംഭാവന കൊടുക്കാം എന്ന നിലയും, പാട്ടും, സിനിമയും, സംഗീതവുമെല്ലാം ഹറാമായമാതിരി പഷ്തൂണിലെ സൂഫി പാരമ്പര്യത്തിൽപ്പെട്ടതെല്ലാം മത പ്യുരിട്ടൻ ചിന്താഗതികൾക്ക് ഹറാം ആയി.

ഒരു പുതിയ മദ്രസ ട്രെയിൻഡ് പ്യുരിട്ടൻ ഇസ്ലാം അഥവാ മൗദൂദി ഇസ്ലാം അവിടെ നിലവിൽ വന്നു. ഈ ഐ എസ് ഐ എന്ന് പറയുന്നത് നമ്മുടെയെല്ലാം മനസ്സിലുള്ള പോലെ യൂണിഫോമിട്ട ഏതോ ഒരു ജനറൽ അല്ല. ഈ മദ്രസകളുടെ, മൊല്ലാക്കമാരുടെ നെറ്റ്വർക്ക് ആണ്.

ഈ നെറ്റ്വർക്കിനെ എതിർക്കുന്നവരെയെല്ലാം വെടിവച്ചോ, ബോംബ് പൊട്ടിച്ചോ കൂട്ടക്കൊല ചെയ്തോ ഒക്കെ കൊന്നു തീർത്തു. ഫുൾടൈം മദ്രസാ പഠനത്തിനു കുട്ടികളെ വിട്ടില്ലെങ്കിൽ പോലും അവരെ ഐ എസ് ഐ കൊല്ലാൻ തുടങ്ങി. മാത്രമല്ല കൊന്ന് ബോംബ് പൊട്ടിച്ചിട്ട് അത് സി ഐ ഏ പൊട്ടിച്ചതാണ് എന്ന് പ്രചരണവും. അപ്പോഴാണ് സി ഐ ഏ അഫ്ഗാനിൽ സോവിയറ്റ് യൂണിയൻ ഇടപെടലിലെതിരേ ആളെക്കൂട്ടൻ ഈ മദ്രസ നെറ്റ്വർക്കുമായി അടുക്കാൻ തുടങ്ങിയത്. ഉടനേ സകല ബോംബ് സ്ഫോടനവും റോ ചെയ്യുന്നെന്ന് പറയാൻ തുടങ്ങി.

പക്ഷേ റോയോ സി ഐ ഏയോ ആണെങ്കിൽ ഐ എസ് ഐ ക്കാരെ കൊല്ലണം. ഈ ലിബറൽ മുസ്ലീങ്ങളെ എന്തിനു കൊല്ലുന്നു എന്ന് ചോദിക്കേണ്ടവരെയെല്ലാം അപ്പോഴത്തേക്ക് ഇല്ലാതാക്കിയിരുന്നു.

മുഴുവൻ ഇല്ലാതാക്കാൻ പറ്റി എന്ന് പൂർണ്ണമായും പറയാനാകില്ല. ബച്ചാ ഖാൻ എന്ന ഭാരതരത്നമായ ഖാൻ അബ്ദുൾ ഗാഫർഖാൻ, നമ്മൾ അതിർത്തിഗാന്ധിയെന്ന് വിളിയ്ക്കുന്ന മഹാത്മാവ് തുടങ്ങിവച്ച് പ്രസ്ഥാനങ്ങൾ (47 കഴിഞ്ഞ് 1988ൽ മരണമടഞ്ഞത് വരെ ജീവിതത്തിന്റെ ഭൂരിഭാഗവും അദ്ദേഹം പാകിസ്ഥാനിൽ തടവറയിലാരുന്നു കേട്ടോ) അവിടെ ഈ മദ്രസാവൽക്കരണത്തിനെതിരേ പ്രയത്നിച്ചു. അദ്ദേഹത്തിന്റെ ആൾക്കാർ ഇന്നും അവിടെയുണ്ട്. പാക് പാർലമെന്റിൽ അവർക്ക് ഒരു എം പീയുമുണ്ട്. പലതവണ ഓട്ടവീണ ശരീരമായെങ്കിലും.

അങ്ങനെ സീ ഐ ഏയുമായി അടുത്ത,  പഖ്തൂൺഖ്വായിൽ പാതി വിജയിച്ച ഈ മദ്രസാ, മുക്രി നെറ്റ്വർക്കിന്റെ ബാക്കി അവർ ആടിയത് അഫ്ഗാനിസ്ഥാനിലാണ്. സോവിയറ്റ് അനുകൂല സർക്കാരിനെതിരേ. ആ നെറ്റ്വർക്കിന്റെ ഇന്നത്തെ പേരാണ് താലിബാൻ.

സ്ത്രീസ്വാതന്ത്ര്യമുണ്ടാരുന്ന, വളരെ ലിബറൽ സ്വഭാവമുണ്ടാരുന്ന, വിദ്യാഭ്യാസവും സ്വതന്ത്രചിന്തയും പോരാട്ടവീര്യവുമുള്ള അഫ്ഗാനിസ്ഥാനിൽ ഈ പഷ്തൂൺ സോഷ്യൽ എഞ്ചിനീയറിങ്ങിന്റെ ഡിറ്റോ ആണ് പകർത്തിയത്. ആദ്യം മദ്രസാ പള്ളി നെറ്റ്വർക്ക്. പിന്നെ ഇസ്ലാമിനെ ശുദ്ധീകരിയ്ക്കൽ,  സൂഫിസത്തിനും വിശാല ആരാധനാരീതികൾക്കും പകരം ശുദ്ധീകരിയ്ക്കപ്പെട്ട ഇസ്ലാം, മദ്രസ നെറ്റ്വർക്ക്, മദ്രസാ ട്രെയിൻഡ് മിലിറ്റൻസ്, കുട്ടികളെ ചേറുതിലേ കുടുംബങ്ങളിൽ നിന്ന് മദ്രസകളിലേക്ക് പിടിച്ച് കൊണ്ട് പോവൽ, അവരുടെ ഭീകരവാഴ്ച.

ഈ താലിബാൻ എന്നത് വലിയൊരു ഗ്രാമത്തിൽപ്പോലും പത്തോ പതിനഞ്ചോ പേർ മാത്രമാണ്. പക്ഷേ ആയുധധാരികളും ഇസ്ലാം ഇങ്ങനെയായിരിയ്ക്കണമെന്ന കൃത്യമായ ട്രെയിനിങ്ങും കിട്ടി മഷ്തിഷ്കപ്രക്ഷാളനം ചെയ്യപ്പെട്ട ഇവർ മതി.

ഈ സംഭവത്തിന്റെ വേറൊരു കൃത്യമായ ആസൂത്രിതമായ ഇമ്പ്ളിമെന്റെഷനാണു കാശ്മീർ താഴ്വരയിൽ നടത്തപ്പെട്ടത്. അല്ലാതെ പട്ടാളത്തിനെതിരേ നാച്ചുറൽ ആയി ഉരുത്തിരിഞ്ഞ എതിർപ്പൊന്നുമല്ല. കൃത്യമായ ആസൂത്രിതമായ സോഷ്യൽ എഞ്ചിനീയറിങ്ങ്. പള്ളി- മുക്രി-പ്യുരിട്ടൻ ഇസ്ലാം - ഇസ്ലാം സമൂഹത്തെയാകെ നിയന്ത്രിയ്ക്കൽ എന്ന അതേ സോഷ്യൽ എഞ്ചിനീയറിങ്ങ് ബ്രിട്ടണിൽ, കേരളത്തിൽ, അമേരിയ്ക്കയിൽ, എന്ന് വേണ്ട ഇസ്ലാം മതവിശ്വാസികളുള്ള എല്ലായിടത്തും ഐ എസ് ഐ ആസൂത്രണം ചെയ്ത് നടപ്പിലാക്കുന്നുണ്ട്.

വെസ്റ്റ് അതിനെ പല രീതിയിൽ ഉപയോഗിയ്ക്കുന്നുമുണ്ട്. സൗദി വഹാബികൾ അതിനെ അകമഴിഞ്ഞ് പെട്രോ ഡോളറൊഴുക്കി സഹായിയ്ക്കുന്നുണ്ട്. ലിബിയയിൽ, സിറിയയിൽ ഒക്കെ ഈ ഗ്രൂപ്പുകാരെ വച്ച് വെസ്റ്റ് ആണ് കളിച്ചത്. ഈജിപ്റ്റിൽ ആ കളി ഒന്ന് പാളി.

കാശ്മീരിൽ വൻ വിജയമായി. അവിടെ ക്ളീൻ ആക്കിക്കഴിഞ്ഞു. ഹറാമായവരെയെല്ലാം അടിച്ച് അല്ലെങ്കിൽ കൊന്ന് പുറത്താക്കിയല്ലോ.

ഇൻഡ്യൻ പട്ടാളം അല്ല ഏത് പട്ടാളമായാലും ഇനി മഹാത്മാ നോർവേയുടെയോ സ്വീഡന്റേയോ പട്ടാളമായാലും ഒരു ഭൂഭാഗത്തിറങ്ങുമ്പോൾ കർശനമായ മോണിറ്ററിങ്ങ് സംവിധാനവും മറ്റും ഉണ്ടായില്ലേൽ അട്രോസിറ്റീസ് ഉണ്ടാകും.കാശ്മീരിൽ അത് ഒരുപാട് കുറവും ഇൻഡ്യൻ പട്ടാളം അവിടെ അവരാൽക്കഴിയുന്ന രീതിയിൽ അത് നിയന്ത്രിയ്ക്കുകയും ചെയ്യുന്നുണ്ട്.

പക്ഷേ ഈ സോഷ്യൽ എഞ്ചിനീയറിങ്ങ് നടത്തി പെർജ് ചെയ്ത് വച്ചിരിയ്ക്കുന്ന ഭൂഭാഗത്തിനെ ഇനി ഏത് ലിബറൽ കോണീന്ന് ചിന്തിച്ചാലും ഒരു ഓഞ്ഞമോനും വിട്ടു കൊടുക്കാൻ പാടില്ല. മിലിറ്റന്റ് ഇസ്ലാം ഭീഷണി നിയന്ത്രിച്ചിട്ടല്ലാതെ എത്ര പട്ടാളക്കാരുടെ ജീവൻ നഷ്ടപ്പെട്ടാലും ശരി താലിബാനു അഫ്ഗാൻ കൊടുത്ത മാതിരി കാശ്മീർ ഒരുത്തനും കൊടുക്കാൻ പാടില്ല. അത് ഇൻഡ്യയ്ക്കെന്നല്ല ലോകത്തിനാകെ ആപത്താണ്.

പാകിസ്ഥാൻ മൗദൂദികൾക്ക് കൊടുത്തതിന്റെ ആപത്താണിപ്പൊ അനുഭവിച്ച് കൊണ്ടിരിയ്ക്കുന്നത്. ലോകം മുഴുവൻ. കേരളത്തിനില്ലാത്ത കാശ്മീരിനു ഒരു സ്വാതന്ത്ര്യവും ആവശ്യമില്ല.

സ്വാതന്ത്ര്യം വേണ്ടത് ഇസ്ലാമിനാണ്. മൗദൂദിസത്തിന്റേയും വഹാബിസത്തിന്റേയും പിടിയിൽ നിന്ന്. അത് എത്രയും പെട്ടെന്ന് ചെയ്തില്ലേൽ ഇങ്ങനെ ഓരോരുത്തർ വച്ച് നീട്ടുന്ന തോക്കുകൊണ്ട് പരസ്പരം വെടിവച്ച് തുലഞ്ഞോണ്ടിരിയ്ക്കും.

ആസാദിനെതിരേ റിബലുകൾ ഐസിസായതും നിലവിളികളും പുടിൻ നിന്ന് കാച്ചാൻ തുടങ്ങിയപ്പൊ വീണ്ടും റിബലുകളായതും ബോധമുള്ളവന്മാരെല്ലാം കണ്ടു കാണുമെന്ന് കരുതുന്നു.
ഇനി ആരൊക്കെ എന്തൊക്കെ സിന്ദാബാ വിളിച്ചാലും ഇൻഡ്യയുടെ ഒരു ജിയോഗ്രഫിക്കൽ അതിർത്തിയും തൽക്കാലം ഒരു കച്ചവടക്കാരനും അടിയറവയ്ക്കാൻ ഉദ്ദേശിച്ചിട്ടില്ല. അത് പാൽപ്പൊടിയായാലും അറബിപ്പൊന്നായാലും

(ഇവിടെയെഴുതിയ കമന്റാണ്. 
https://plus.google.com/u/0/+simynazareth/posts/1UzbuWgDWL7)

No comments:

Post a Comment